Ҳужжатда чет элликларга кексалик учун ижтимоий тўловларни «тегишли қўшимча тўловларни ҳисобга олган ҳолда» бекор қилиш таклиф этилади. Қонун лойиҳаси тасдиқлаш учун ҳукуматга юборилди, деб ёзди «РИА Новости».

Қонун лойиҳаси муаллифлари «Россия кўплаб хорижликлар учун жозибадор мамлакат, жумладан, Россия пенсиясини олиш имконияти туфайли» эканини таъкидлайди.

«Шу билан бирга, Россияда ўртача тайинланган пенсиянинг ўртача иш ҳақига нисбати қарийб 28 фоизни ташкил этади, яъни... пенсия иш ҳақининг учдан биридан камини қоплаш имконини беради, бу эса унинг бутун мамлакат бўйлаб ниҳоятда пастлигидан далолат беради», дейилади парламент аъзолари берган тушунтириш хатида.

Амалдаги қонунчиликка кўра, ижтимоий пенсия олиш ҳуқуқи Россияда камида 15 йил яшаган, яшаш учун рухсатномага эга бўлган ва маълум ёшга етган чет элликларга берилади (эркаклар учун 70 ёш ва аёллар учун 65 ёш).

ЛДПР ташаббускорлари пенсия тизимини асоссиз мажбуриятлардан ҳимоя қилишга, бюджет юкини камайтиришга ва пенсияни давлат қуришда иштирок этиш натижаси деб ҳисоблайдиган тамойилга ишончни тиклашга ёрдам беради, деб ҳисоблайди.

Kun.uz