Haber Gazetesi газетаси ёзишича, Туркиянинг етакчи авиакомпанияси ҳисобланган Turkish Airlines аллақачон борт кузатувчиларига (стюардесса) йўловчиларни янги қоидалар ҳақида хабардор қилишга алоҳида эътибор қаратиш бўйича кўрсатма берган.

Борт кузатувчилари бундай ҳодисаларни қайд этиб бориш ва қоидабузарликлар бўйича маълумотларни тегишли органларга топшириш ҳуқуқига эга бўлади.

Ўзгартиришлар экипажга «хайрлашув эълони»дан сўнг йўловчиларга хавфсизлик камарлари чироғи ўчмагунча ўз жойларини тарк этмаслик ва багаж жавонларини очмаслик ҳақида қўшимча огоҳлантириш беришни кўзда тутади. Ушбу қоидани бузган йўловчилар авиадебошир (безори) деб ҳисобланади. Қоидабузарлик учун жарима миқдорига аниқлик киритилмаган.

Таъкидланишича, бундай чоралар парвоз хавфсизлиги ва ҳаво кемаси бортидаги тартиб-интизомни оширишга қаратилган. 

Turkish Airlines авиаташувчиси вакили Akdeniz Gerek нашрига берган изоҳида янги қоидалар – нафақат интизомий чора экани, балки йўловчилар ва атрофдагилар учун хавфли ҳолатларни камайтиришга қаратилган қадам эканини билдирган. Муқаддам самолёт ҳаракатда бўлган вақтда йўловчилар ўрнидан туриб кетиши ёки жавонлар юкланган бўлим очилиши оқибатида юклар тушиб кетиши бир неча бор жароҳатга сабаб бўлган.

«Биз бу хатарларни минималлаштириш ниятидамиз», – дейилади хабарда.

Kun.uz