Yaponiyaning Osaka shahrida “Women in Tech Global Summit 2025” xalqaro sammiti bo‘lib o‘tdi. Dunyoning 50 ta mamlakatidan 400 nafardan ortiq ishtirokchilarni birlashtirgan tadbirda texnologiyalar sohasida gender tengligi va xotin-qizlarning raqamli sektordagi ishtirokini kengaytirish masalalari asosiy mavzu bo‘ldi.

Mamlakatimiz delegatsiyasiga O‘zbekiston Respublikasi  Raqamli   texnologiyalar  vaziri maslahatchisi Kamola Sobirova boshchilik qildi. “Women in Tech Uzbekistan” jamoasi yurtimizning raqamli  transformatsiya yo‘nalishidagi  yutuqlari hamda  IT sohasida xotin-qizlarga  teng imkoniyatlar yaratishga qaratilgan tashabbuslarni namoyish etdi. 

Sammit doirasida  ishtirokchilar “EXPO 2025” rasmiy dasturiga kiritilgan «Innovatsiyalar yo‘li» nomli  O‘zbekiston  milliy pavilonini ko‘rdilar. Mamlakatimiz vakillarining ushbu tadbirda AQSH, Germaniya, Fransiya kabi rivojlangan davlatlar qatorida ishtirok etishi O‘zbekistonning o‘sib borayotan innovatsion salohiyatining global darajadagi e’tirofi bo‘ldi. 

Tadbir O‘zbekiston Respublikasi Vazirlar Mahkamasi huzuridagi Madaniyat va san’atni rivojlantirish jamg‘armasi ko‘magida tashkil etilgan bo‘lib, 15 ta mamlakatdan 100 dan ziyod mehmonlarni bir joyda jamladi. Tashrif buyurganlar mamlakatimizning  boy madaniy merosi va raqamli kelajakka bo‘lgan startegik  qarashlari bilan tanishdilar. 

Sammit doirasida Osaka bayonnomasi imzolandi. Hujjat hozirgi raqamli davrda  gender  tengligini ilgari surishga qaratilgan  xalqaro tashabbus hisoblanadi. O‘zbekiston Respublikasi Raqamli   texnologiyalar  vazirligi tashabbusni  qo‘llab-quvvatlab, tenglik va inklyuzivlik – mamlakatimiz   raqamli kelajagining kaliti ekanligi ta’kidladi. Vazirlik “IT Park Uzbekistan” bilan hamkorlikda xotin-qizlarda raqamli  ko‘nikmalarni rivojlantirish, startaplarni qo‘llab-quvvatlash va  yoshlarni texnologiyalar sohasiga yanada kengroq jalb qilish bo‘yicha qator dasturlarni amalga oshirmoqda. 
 

“Women in Tech Uzbekistan” jamoasi ushbu yo‘nalishdagi samarali  faoliyati uchun “Youth Engagement Award” xalqaro mukofotiga sazovor bo‘ldi. Mukofot mamlakatimizning texnologiyalar sohasida yoshlar yetakchiligini rivojlantirishga qo‘shgan hissasi e’tirofi bo‘ldi.

— “Women in Tech Global Summit” da ishtirok etish xotin-qizlarning texnologiyalar sohasidagi o‘rnini  kuchaytirish va O‘zbekistonni  mintaqaviy IT-xabga aylantirish yo‘lidagi muhim qadamdir. Biz xotin-qizlarda  zamonaviy raqamli ko‘nikmalarni shakllantirish bilan birga ularni mamlakatimiz iqtisodiyoti kelajagini barpo etishda faol  ishtirok etishga  rag‘batlantiramiz. “Youth Engagement Award” mukofoti sa’y-harakatlarimizning  xalqaro e’tirofi va yangi mas’uliyatdir, - dedi Kamola Sobirova.

Sammit doirasida tashkil etilgan muhokamalar O‘zbekiston uchun xalqaro hamkorlik va qo‘shma tashabbuslar  bo‘yicha  yangi ufqlarni ochdi. Mamlakat xotin-qizlar va  yosh innovatorlarga sarmoya kiritish orqali  global  raqamli taraqqiyotga  hissa qo‘shadigan yangi yetakchilar avlodini  shakllantirmoqda. 
 

— O‘zbekiston misolida turli hayotiy tajribaga ega insonlar  birgalikda  inklyuziv va adolatli jamiyat barpo etayotganini ko‘rish mumkin. Yoshlarda hurmat, tenglik va insoniylik kabi fazilatlarni shakllantirish taraqqiyot sari tashlangan katta qadamdir, — dedi “Women in Tech Uzbekistan” direktori Anna Ambrozevich. 

O‘zbekiston xotin-qizlar va yoshlarni qo‘llab-quvvatlash, raqamli texnologiyalarni rivojlantirish orqali yuqori texnologiyalar sohasida xalqaro maydondagi obro‘sini oshirmoqda. Mamlakatimizning  sammitdagi ishtiroki  barqaror va  inklyuziv kelajak sari tashlangan navbatdagi qadam bo‘ldi. 

Aziza Alimova tayyorladi, O‘zA