Ўзбекистоннинг Мисрдаги элчихонаси томонидан инглиз тилида соддалаштирилган услубда ўзбек тилини ўргатувчи “Uzbek Language: Complete Self-Study Guide in 22 Lessons” номли қўлланма чоп этилди.

Муаллиф – элчихонанинг маданий масалалар бўйича масъул ходими Отабек Алимов.

Инглиз тилидаги нашр 400 нусхада чоп этилган бўлиб, элчихона томонидан ушбу китоб Мисрдаги кутубхоналар, ўзбек тилини ўрганаётган Қоҳира университети талабалари орасида тарқатилмоқда.

– Шунингдек, Ўзбекистоннинг бошқа давлатлардаги элчихоналари орқали ўзбек тили ўқитиладиган хорижий университетларга ҳам етказиш режалаштирилган, – дейди муаллиф.

Қайд этиш жоизки, мазкур қўлланма бошқа давлатлардаги ўқувчилар учун АҚШ, Канада, Буюк Британия, Германия, Франция, Испания, Италия, Нидерландия, Швеция, Полша, Япония ва Австралиядаги AMAZON платформаларида (https://www.amazon.com/dp/B0F2MJ3SBC) ҳам электрон ва босма китоб шаклларида жойлаштирилган, “Google Books” ва “Google Play” платформаларида (https://play.google.com/store/books/details?id=NoRQEQAAQBAJ) эса илова шаклида топиш мумкин. Ўзбек тилини кенгроқ ёйиш мақсадида китобга минимал нарх белгиланган.

– Дарслик рус тилига ҳам таржима қилиниб, лойиҳа нусхаси “Узбекский язык: Полный курс за 22 урока” номи билан LITRES платформасида (www.litres.ru/71903224/) электрон шаклда мавжуд. Ушбу нусхаларни Ўзбекистонда ҳам чоп этмоқчимиз, – дейди Отабек Алимов.

Қўлланма айни кунларда араб тилига ҳам таржима қилинмоқда.

Мазкур дарслик хорижий тилларни ўрганиш тажрибаси ва Ўзбекистон давлат жаҳон тиллари университети ҳамда Тошкент давлат шарқшунослик университети мутахассислари тавсияларини инобатга олган ҳолда тайёрланган.

– Маълумки, хорижий тилни ўрганган шахс тегишли давлатга борганида расмий тил ва халқ қўллайдиган сўзлашув ўртасидаги фарқ туфайли ушбу тилни тушунишда қийинчиликка учрайди, – дейди китоб муаллифи. –Шуни инобатга олиб, ўзбек тили шевалари ва уларнинг фарқлари изоҳланган ҳамда адабий тилга киритилмаган, аммо оғзаки нутқда кенг фойдаланиладиган ўзлашма сўзлар ҳам мазкур китобга илова қилинган.

Муаллиф хорижий тилни шеър ва қўшиқлардан фойдаланиб ўрганиш қулайлигини инобатга олиб, оммавий қўшиқлар матнини китобга киритган, улардаги мураккаб сўзларнинг изоҳли таржимаси берилган. 

Китобда Ўзбекистон ва унинг қадимий шаҳарлари, буюк тарихий шахслари тўғрисида қизиқарли маълумотлар ҳам мавжуд.

Мисрдаги ўзбек тили ўқитиладиган олий ўқув юртлари талабалари янги дарсликдан мамнун эканларини билдиришмоқда.

Муҳаммаджон Обидов, ЎзА