Тожикистонда "лайк" учун жиноий жавобгарлик бекор қилинади

Мамлакатда шу пайтга қадар Жиноят кодексининг ушбу нормаси билан 1507 киши жавобгарликка тортилган.

Жорий йил 14 май куни Тожикистон президенти Эмомали Раҳмон "Тожикистон Республикаси Жиноят кодексига қўшимчалар киритиш тўғрисида"ги қонунни имзолади. Мазкур ҳужжат билан 2018 йилдан буён амалда бўлиб келган ижтимоий тармоқларда «лайк» ёки шунга ўхшаш бошқа белгилар ёрдамида муносабат билдирганлик учун жиноий жавобгарлик бекор қилинади.

Аввалги тартибда тақиқланган материалларга қўйилган «лайк»лар ва улашишлар интернетда терроризмни қўллаб-қувватлаш деб малакаланар ва 15 йилгача қамоқ жазоси билан жазоланарди.

Белгиланишича, янги ўзгариш мамлакатда экстремистик ташкилот деб топилган манбалар тарқатган материалларга қўйилган «лайк» ёки бошқа белгиларга тегишли эмас.

ОАВнинг ёзишича, мамлакатда шу пайтга қадар Жиноят кодексининг ушбу нормаси билан 1500дан ортиқ киши жавобгарликка тортилган.

«Янги Ўзбекистон» ва «Правда Востока» газеталари таҳририяти»

Belgilangan matnni tinglash uchun quyidagi tugmani bosing Powered by GSpeech